Emisyon sa te fèt nan kad pwomosyon pou entwodywi oktòb kòm Mwa Kreyòl; yon inisyativ ki ta vle wè lang manman vin lang ansèyman nan tout nivo lekòl Ayiti pou diminye to 97% ayisyen ki pa rive antre nan inivèsite akoz deriv sistèm edikasyon fransè a, selon minis edikasyon nansyonal Nesmi Manniga.
Pou powèt Wilsonn Telimo Lwi, si edikasyon fèf nan lang tout ayisyen konprann pi byen an, y ap gen plis chans fini lekòl. E si plis ayisyen rive fini lekòl, ap gen plis ouvèti inivèsitè, biznis ak kreyativite, epi to iletris ak analfabèt la ap diminye. Konsa tou, ka gen mwens delekans jivenil, mwens degradasyon anviwònman ak yon popilasyon ki fòme. Jiris la ta kwè menm ayisyen ki vwayaje nan peyi etranje ap gen plis posiblite pou kontinye etid yo, epi retounen lakay vin desèvi kominote yo KÒTAKÒT.
Espesyalis nan sèvis piblik la, Wilsonn Telimo Lwi, sigjere yon desiyon pou edikasyon kreyòl fèt nan lekòl pa t ap anpeche okenn lòt lang etranje tankou fransè, espanyòl ak anglè anseye kòm matyè nan lekòl. Men aktivis kreyolis la kwè ak tout kè li ke ansèyman nan lang manman se meyè pilye pou retire Ayiti nan tout kriz li ye jounen jodi a, tankou: ensekirite, kidnaping, famin, lojman, sante, elatriye, si edikasyon se baz devlòpman yon nasyon vre.
Madi ki te 27 septanm 2022
