M pa ka wont di sa, se nan vilaj la
M aprann g a ga nan fèy malanga
Se nan Vilaj de Dye mwen leve ti taktak
E m pa t janm tande pèsòn nan kadejak
Mwen te gen chans grandi nan yon espas
Ki ba lavi m yon sans pou tout lòt enpas
Nan savann kou bò dlo, anba tout solèy cho
Se te gwo bouk kabrit k ap fè kòn sonnen bit
Se la m aprann jwe yoyo, kouri nan koridò, fè lago
Jwe siye kole, fè wolèmen ak soperiye sou yon sèl men
M pa ka bliye tèt akribit chak dimanch channmas
Pidetwal epòk krismas ki ranplase pa ti sourit
Fè blòk ak ti mamit pou nou fè fou ak labou
Ki pral kwit bon biskwit pou timoun nan tout lakou
Sou do tout kay dal beton, kap papiyèt, kou lamidon
Se te sèvolan k ap pran pik pou depeyize sa k pi apik
Tout ti koridò se te nou, do tounen ap boulinen
Awoyo ap badinen pou dekore toupatou
Manman m te machann kenkay, kèk fwa li konn fè fritay
Akasan, kafe, oswa chokola, tèlman zòn lan te woulala
Moun te renmen moun, se te lanmou bò lari-a
Ou te mèt gwo zouzoun, sekirite w pa t branle lè swa
Sèlman nan plen lannwit, chat te konn rele timoun
Epi kout mò Latibonit pou tripotay ak sou moun
Kèk bal te konn sonnen zòn bwat chèn, gran chemen
Sitou bò Pòtay Lewogàn, men jamè rive kay Antwàn
Mwen te fè kindègadenn tou pre Teyat Nasyonal
Se te yon paradi nasyonal, li ta tankou jaden edenn
Site Letènèl te anpè nèt! Menm anba, bò site Plis Kat
Ou pa t konn bezwen linèt, ni janm mache an kat pat
Se nan ri Charewon nou te konn benyen lido-lido
Lè pou nou bwè dlo, n ale nan tiyo Kay Nason
Petèt kèk fwa tou, moun konn mouri bò lanmè-a
Se ta bagay douvanjou, paske timoun pa p wè sa
Mwen sonje mang, tif, sirik ak krab mazòrèy
K ap kouri sou gang, nan labou, anba solèy
Mademwazèl k ap vole ak papiyon byen dekore
Chodyè bouyon kay Pitèsya ki fè chak nèg yon sipèsta
Gade televizyon bò lari-a san grate tèt jiska minwi
Oswa al gad taykonndo pope karate dèyè rido
Kote Payito, Meyè, Bètoni, ak Madan Kayèl, Titit Bondye?
Souvni yo anpil, nou pa ka bliye Makis, Jid, Doudou ak Feri
Lè lapli tonbe, pou n ap glise desann sou vant sou tout glasi
Èske se vre, Vilaj la transfòme nan kidnaping ak move souvni?
Hng!
Powèt Wilson Thelimo Louis.
