Anbasadè lòt peyi pa dwe ka rete Ayiti nan moman sa nou ye la, antanke yon peyi san sekirite. Yon peyi ki pa gen sekirite pa ta dwe ka ap pwolonje teritwa lòt peyi. Fèmen tout anbasad Ayiti tanporèman, menmjan yo sispann bay yon seri tip viza pou ayisyen vizite lakay yo. Se yon ti reyalite tout moun pa ka wè. Si w nan batay ak madanm ou chak jou, pitit ou ap joure w: ou pral pran etranje vin fè desant lakay ou? Dayè lè w gen etranje ki rete lakay ou pandan moman konfli, se mache yo mache pale w mal bay antouraj yo, epi kraze fwaye w an soudin. Yo pa p pran pozisyon nan transparans, ni vin jije w, pou yo pa pèdi plas ebèjman yo. Kidonk, n a deside si se pou n mete yo deyò oswa kraze fwaye nou. Dayè depi etranje wè nou youn pa respekte lòt, li pa p respekte w nan pwòp kay ou tou. Se sa nou rele lwa izyèl.
Wilsonn Telimo Lwi
