Pati politik KÒTAKÒT ak òganizasyon literè, sosyoedikatif epi kiltirèl ITIAHaiti felisite Ministè Edikasyon Nasyonal ak Fòmasyon Pwofesyonèl (MENFP) pou gwo efò yo fè devan demand klas majoritè a, pitit sòyèt, moun neglije, inyore, meprize, iletre epi analfabèt yo, pou kòmanse pwogram edikasyon kreyòl nan lekòl Ayiti (EKLA). ITIAHaiti ak KÒTAKÒT kwè defi pou jèn ki akize nan dwòg, kidnaping, gang ak tout lòt sò mond lan lage sou Ayiti yo leve.
MENFP ta fè konnen pou: “ane lekòl 2022-2023 a, paran p ap oblije achte yon pakèt liv nan 1e ak 2e ane.” Enstitisyon patnè obsèvatè yo swete se pa yon kalbendaj pou demaske kanpay yo ap mennen an paske yo t ap prefere estrateji pou edike timoun yo nan lang manman kòmanse depi nan nivo kindègadenn epi grandi chak ane. Kominote jiris entèlektyèl k ap emèje yo ba otorite wondonmon konsène yo benefis dout, epi tou pwofite di yo fwa sa gen je k ap gade anba yo.
Sa ki te pase nan veye a pa p pase nan antèman, ni nan nevèn lan. Rezo entènasyonal volontè pou Ayiti yo mete yo disponib pou ankouraje travay Leta k ap konbat lekòl plizyè vitès k ap fòme divès kategori sitwayen nan peyi a, ki pa gen menm chans pou reyisi nan nan lavi. Yo fyè tou paske konsène yo itilize prèske menm vizyon ak misyon yo genyen an pou ateri ak kòmansman revolisyon pou Ayiti otonòm lan. Nou priye yo an gras pou kite mesyedam yo kontinye vòlè, epi fokis sou travay sakre sa yo vle fè a souple.
Wilson Thelim Louis,
Prezidan 2 ògàn yo.
SOUS: #LekòlPaKaTann/ Gwoup WhatsApp ITIAHaiti.org
“LIV INIK AN KREYÒL
Ane lekòl 2022-2023, Paran p ap oblije achte yon pakèt liv nan 1e ak 2e ane. Se youn nan mwayen Leta ap konbat lekòl plizyè vitès k ap fòme divès kategori sitwayen, ki pa gen menm chans pou reyisi nan lekòl ak nan lavi. Leta deside konbat eksklizyon ak vilnerabilite ki bay vyolans n ap viv la.
Liv Inik 1e ak 2èm Ane fondamantal ap gen 5 matyè obligatwa ki nan pwogram yo: Kreyòl, Franse, Matematik, Syans sosyal ak Syans eksperimantal. Liv Inik sa ap ekri an kreyòl, mizapa matyè Franse. L ap gen kaye egzèsis k ap pèmèt Anseyan itilize kreyativite yo pou fè timoun yo fè aktivite atistik, kiltirèl, syantifik pandan y ap aprann. Liv Inik la ap vini tou ak, fich pedagojik, tablo pwogresyon chak semèn k ap ede Anseyan itilize yo pou pèmèt elèv reyisi. Konsa Jaden eskolè ka sèvi pou aprann matematik, syans eksperimantal…
MENFP HAITI Officiel p ap fè kado Liv Inik yo k ap rete pwopriyete Leta. L ap remèt chak Konsèy Lekòl (Paran Direksyon…) nan lekòl piblik ak prive yo pou tout elèv ka itilize l.
Ane lekòl 2023-2024, MENFP ap kontiye Liv Inik la nan 3èm ak 4èm Ane Fondamantal. Se konsa n ap konbat lekòl plizyè vitès ak soulaje Paran ki p ap oblije achte anpil liv.
Avèk Inifòm Inik nan lekòl piblik, nan ane 2015, ki elimine vyolans kote elèv sispann batay ant yo, MENFP ap vanse ti pa, ti pa nan lekòl egalite-fratènite "L'Union fait la Force", jan zansèt yo te trase chimen an. Zam te ban nou yon Peyi, Edikasyon ap ba nou yon Nasyon !
Nesmy Manigat”