Wilson Telimo Lwi fèt 3 jiyè 1986 nan depatman Grandans, Ayiti. Li fè etid primè li nan lekòl Sen Franswa Dasiz sou zile Dilavach, epi segondè nan Lise Filip Gèrye nan vil Okay. Li etidye kominikasyon sosyal nan Sant Edikasyon ak Fòmasyon Teknik Okay, epi li fè dwa nan Inivèsite Leta Ayiti. Li se ansyen kandida pou depite nan 50yèm lejislati-a pou sikonskripsyon Okay ak Ilavach an 2015 anba banyè Pati Demokrat Kretyen Ayisyen. Li te swete kandida pou senatè tou an 2016 sou banyè Konbit pou Rekonstwi Ayiti.
Telimo se Prezidan lekòl literè ITIAHaiti, ansyen direktè epi fondatè Enstiti Pwofesyonèl Fòmasyon Adapte nan Kominikasyon, li se manm fondatè Rezo Nasyonal Jèn Volontè Ayiti. Li te travay kòm volontè nan òganizasyon Volontarya Pou Devlopman Ayiti ; Enstiti Byenèt Sosyal ak Rechèch nan Ministè Zafè Sosyal ak Travay sou lobedyans UNICEF ; Lakwa Wouj Ayisyen ; Federasyon Ayisyen Asosyasyon ak Enstitisyon moun ki ap Viv ak Andikap. Li te responsab kominikasyon nan “l’Amicale des Juristes” pou zòn sid Ayiti. Powèt la te konn anime emisyon literè nan Radyo Men Kontre, epi direktè maketin ak prezantatè emisyon nan Telerik chèn 9 Okay.
Lwi te konn dirije atelye literè nan Alyans Fransèz Okay, epi li te responsab oganizasyon nan Pati Fizyon Sosyo-Demokrat Ayisyen nan Sid. Li te konn travay ak ministè jenès, espò ak aksyon sivik nan kad aktivite fòmasyon kiltirèl, espò ak kominotè. Li se manm fondatè Sant Ayisyen pou Aksyon Imanitè nan peyi Lafrans, epi li pran fòmasyon sou relijyon nan legliz Jezi-Kris pou sen dènye jou yo.
Powèt la antre Etazini nan mwa out 2016 pou pran yon souf anba presyon politik epi ranfòse kapasite entèlektyèl li. Li kontinye fè travay volontarya nan Katolik Charite Boston, li anime emisyon literè ak kiltirèl nan radyo ak televizyon. Li aprann kijan pou travay ak ti granmoun nan K&K Sant Sante, Bwòktonn. Li aprann paralegal nan Inivèsite Boston ; videyografi nan Kominote k ap Sipòte Fim, Roxbury ; epi li pran sètifika pou ede moun ki ap viv ak andikap nan Goodwill, Roxbury. Li travay kòtakòt ak òganizasyon Rezo Jèn Ayisyen ki nan pwojè Neyemi pwojè pou Lepwa nan Masachousèt, epi li ap fè yon metriz nan sèvis piblik nan Inivèsite Akannzas, Lekòl Sèvis Piblik Klintonn. Mezanmi, jèn patriyòt sa se yon anbasadè pou Ayiti.
Jan-Bètran Oriza,
Ekriven, Ekonomis.